رسم مجموعة من شعراء قروب ابواب الثقافي اجمل صور الحب والوفاء للوطن وذلك بكتابه قصيدة وطنية جماعية حملت في ابياتها الوفاء والحب والتضحيه لوطن العز والشموخ
القصيدة حملت مشاعر وأحاسيس كل من :
صالح الشادي
محمد الدحيمي
خالد بن جلسه
سعيد ال منصور
خالد البلادي
صالح الداغش
رحاب يوسف
مناحي العوفي
عبرة شعر
ياسر العنزي
نادر العماني
بندر السفياني
عايض بن مساعد
بدر خضير
عبدالمجيد الزهراني
على السبعان
محمد السعيد
فهد الصقري
ردة السفياني
حمد عويد
وفي بادرة غير مستغربه وتنم عن وفاء وإنسانيه شارك في صياغه القصيدة من دوله الكويت الشاعر حمد عويد ومن مملكة البحرين الشاعرة رحاب يوسف
الجدير بالذكر ان قروب ابواب الثقافي هو اكبر وأشهر قروب واتسب ويضم عدداً كبيرا من الأدباء والشعراء والنقاد والإعلاميين المشهورين على مستوى الخليج والدول العربية
القصيدة الجماعية التي ابدع في صياغة أبياتها الشعراء الاوفياء كانت على النحو التالي :
اعوذ بالله من ردى كل شيطان
ومن الفتن واهل النفوس الوضيعه
حنا عيال المملكة شعب سلمان
ولائنا في ذمتي مانبيعه
محمد الدحيمي – السعودية
………………….
حنا في أرض المملكه مثل الإخوان
محبة الحكام فينا طبيعه
يخسى و يعقب كل خارج و خوان
اللي لفكر الغير مثل التبيعه
خالد بن جلسه – السعودية
………………..
يا مملكتنا يا ذرى كل إنسان
يا منبع الدين الشريف وربيعه
حنا على عهد الولاء صف بنيان
إخوان في الوقفات سنه وشيعه
سعيد ال منصور – السعودية
………………..
الله اكبر والنصر فيه بيبان
حنى معه سلمان كلنا نطيعه
لافرق الله بين .. اخوه وجيران
كلنا نحبه دام .. نهجه شريعه
رحاب يوسف – البحرين
…………………
قولوا لاهل ايران واذناب ايران
ذي دارنا ماتنحكم بالخديعه
الله وضعنا للمخاليق عنوان
والله بينصرنا بعزه شفيعه
خالد البلادي – السعودية
…………………
هذا الوطن ياصاحبي حصن وحصان
تحت الحجيج وفوق مد الفجيعة
من ارض عرعر لي نهايات نجران
لأجل الوطن ضاقت علينا الوسيعة
صالح الداغش – السعوية
………………..
الى انفتح للشر طاقه وبيبان
في خيرنا نسد بابه وريعه
ولازاد قومتنا لها هيبه وشان
اقرب لنا وصف السباع المجيعه
مناحي العوفي – السعودية
………………….
لارض الوطن درعٍ على طول الازمان
ندراه ونصونه ونحفظ صنيعه
يبقى وطنا ذخرنا تاج الاوطان
هذا ولانا ف المنابر نذيعه
عبرة شعر – السعودية
……………….
حنا سلام ان كان للسلم عنوان
بالخير نبذل كل مانستطيعه
وان ولعت للحرب نارٍ ودخان
الموت كن ارواحنا له وديعه
ياسر العنزي – السعودية
……………….
تجمّعت فـ المجد روح ٍ وريحان
شجرة من العنبر ، وعزّة رفيعه
الله كتب فيها من الأمن وإيمان
كن بثراها غيم ، والناس قيعه
نادر العماني – السعودية
………………..
يبقى وطنا عز في عز لا هان
غالي وعالي دايما فالطليعه
في شرعنا لاصار للحرب ميدان
ماعندنا من باب سد الذريعه
بندر السفياني – السعودية
…………………
يا دارنا للمجد ذكرى وبرهان
يشهد لنا الخفجي وحرب الوديعة
ما هان من منهجه سنة وقرآن
وحنا جنودك والحصون المنيعة
عايض بن مساعد – السعودية
…………………
المملكة فـ حماة ذربين الايمان
اهل الوفا واهل القلوب الشجيعه
الصف واحد ما يجي فيه نقصان
متكاتفين ولا نشوف الهزيعه
بدر خضير – السعودية
………………….
هذا الوطن طيرٍ خيالي بجنحان
واحنا معه توأم بدون ( الربيعة )
ريحة تراب ولامست ثوب هتّان
جبهة رمل ومن الكرامة رفيعة
عبدالمجيد الزهراني – السعودية
…………………..
راياتنا بالهدي والسيف تزدان
أما الهدى والا السيوف البريعه
واحفاد كسرى لو بنوا سور وايوان
بنقوّضه باحفاد قيس وربيعه
على السبعان – السعودية
……………………
هذا وطن في زحمة الهرج ما بان
لكن بْـ “زبـدة” ما فـعـل فـ الطليعة
مهما علا شانه تواضع على شان
يبخل بْـ بعضه لاْجل يجزل جميعه !
محمد السعيد – السعودية
…………………….
وما دام فينا صوت يصدح بالآذان
ماهمنا بأهل النفوس الوضيعة
ربك حفيظ ودارنا بعين رحمان
ولا فكرت بالخانعة والصديعة
صالح الشادي – السعودية
……………………..
ارواحنا ترخص لأجل روح الانسان
وأجسادنا تبقى حصونٍ منيعه
ماهمنا مفسد وكافر وشيطان
هاماتنا من فضل ربي رفيعه
فهد الصقري – السعودية
……………………..
ياموطني واحساسنا فيك وجدان
ينبض وفا مع كل نبضه سريعه
في كل ذرة رمل لك دفقة احسان
تحول بين احساسنا والقطيعه
ردة السفياني – السعودية
……………………….
من دار ابو ناصر لجل عين سلمان
واجب علينا ننصره بالطليعه
جميلكم واضح علينا من ازمان
نشري رضاكم للأبد ما نبيعه
حمد عويد – الكويت